Никул эркай стихи на эрзянском языке
Обновлено: 22.11.2024
Литературно - музыкальная композиция, посвященная творчеству Никула Эркая.
| Вложение | Размер |
|---|---|
| syukprya_tet_erzyan_tsekov.doc | 55 КБ |
Предварительный просмотр:
МОУ «Дубёнка велень средней общеобразовательной школа»
Сюкпря теть, эрзянь цёков!
(литературно - музыкальной композиция, кона алтави Н.Эркайнень)
Ютавтызе: Косолапова Вера Павловна
тиринь келень ды литературань тонавтыцясь
1. Кастомс эйкакштнень мелест поэтэнть произведениятнень ловномантень;
2. Кирвастемс седеезэст эрзянь келентень ды тиринь ёнксонтень вечкемань толнэ.
«Сехте питней монень эрямосонть монь масторось»
Мезеяк а полавты те моданть,-
Эрзянь модась монень – родной ава.
Инее пингень чинть ало эрязо,-
Зярдояк мартонзо мон а яван.
Мон чачинь те моданть меште лангсо,-
Сурань сиянь ведьсэ экшелимизь
Ярсынь вейсэ чувтонь ве вакансто,
Живой ведте кечестэ симдимизь.
Вай, эрямо, минек од эрямо,
Кисэть палы толсо Монь седеем.
Весе пингем Тонь карман морамо,
Каплянь пес чудевтьса седей леем.
Неть лембе валтнэнь поэтэсь алтынзе эсь масторонтень. Талантось – свал чуда! Минь ансяк дивсетяно тенень, кода эрзянь бедной семиясто лиссь истямо покш поэт!
«Н.Эркай – аволь ансяк поэт, аволь ансяк прозаик, аволь ансяк эйкакшонь писатель, но писатель, поэт, Гражданин»,- истямо питне макссь масторонь содавикс писателесь Сергей Баруздин Никул Эркайде, Никул Лазаревич Эркайде.
Н.Эркаень лемдизь мокшэрзянь цековокс. Сонензэ максозь Мордовиянь заслуженной поэтэнь лемесь, казезь Якстере Знамянь ды Знак Почёта орденсэ.
Чачсь Н.Эркай 1906-це иестэ маень 22-це чистэ Ромодановской райононь Курилова велесэ сокицянь-видицянь семиясо. Эсензэ родной веледензэ поэтэсь сёрмады «Садо минек велев» стихотворениясонзо.
Пандо прява чинзэ алга
Курилова велесь чалгавсь
Тундонь садтнэ тесэ лакить,
Мазый тейтерть эзгаст якить.
Велень кудряв те садпиренть
Поладызе пиже виресь
Минек велев, оят, садо.
Тусто садтнэс ваятано.
Пандо прясо, чинзэ ало
Учи Курилова велесь
Сонзэ садтнэ рощакс валовсть
Сравтовсь весе веленть келес
Цеця экшес кекшевтядо
Тосо Моро, цёков Моро
Мир – масторонь марятадо.
Кудряв виртне, минек лейтне,
Килей виртнесэ тейтертне
Славить Тонь, инее Россия.
Моро «Край, мой край»
Лембе валсо ледстни поэтэсь авадонзо, кона макссь тензэ эрямо.
Бути течи Монь авам эряволь,
Мартон сон улевель театрасо.
Икельць рядов сон течи молевель
Ды аштевель неявикс таркасо.
Весе бу вановольть сонзэ чамас,
Бархат лангс путозь кедензэ ёнов.
Путомс бу те чаманть рамас,
Рисовамс бу сонзэ сырнень коневс.
Витевлизе сивеем лембе кедьсэ,
Вадяштавтызе бу прясо черем …
Часиянь минутастонть сон ледсь тень,
Пек бойкасто токнозевсь седеем.
Эрзянь ава чачтымим, кастымим,
Кедь лангсо уцяскантень кандымим.
Зяро вий пурнынь мон ловсостонзо,
Зяро кеняркст саинь моростонзо.
Рана кармась содамо, кода а шождасто добовави кши сускомось. Покш мелезэ ульнесь тонавтнемс. Прядынзе колмо класстнэнь, комсеце иетнень ушодомсто, кода активистэнть, кучизь Пензав 1 ступенень совпартшколав тонавтнеме.
Тонавтнеманть прядомадо мейле участвовась велесэ од эрямонь кемекстамосонть, тонавтсь ломантнень сёрмас содамо.
Ушодсь газетас сёрмалеме, 1926-це иестэ туи 2-це ступенень совпартшколав, конань прядомадо мейлетуи Московов журналистэнь Всесоюзной институтов. 1929-це иестэ «Якстере Теште» газетасо печатазельть кавто стихотворениянзо «Морадо поэт» ды «Одов велесан».
Косо бу поэтэсь аволь уле, сонзэ свал терди тиринь модась. Мик Московстояк сон сёрмады: «Капшан, учить сырнень килей рощатне».
Таго монь вастымизь.
Килейть Сура лангсо
Мекс кадыя ошонть,
Овсе мон а янксян.
Цяпить пиже лопат-
Кучинь чинтень слава.
Чачинь авань мешес-
Лембе родной модась
Чись куротнень юткска
Парсей коцтонть кодась
Сехте питней монень
Састынька пря пезэнь
Валгсь цециязь маесь.
Ашо килей, ашо керь,
Зярдо нейтян – лаки верь.
Ашо килей, ашо керь,
Сура лангонь од тейтерь!
Тонтеметь, Сура, арась,-
Прязот цековось озась …
Вирь эрицятне пурнавсть,-
Суранть волнанзо лоткасть.
А панить венчем веслатне,
Комасть сыре кузонь прятне,
А морыть тошкий нудейтне
Пилест стявтызь пиже чейтне!
Ашо килей, ашо керь,-
Зярдо нейтян – лаки верь!
Рангстызе моронть цековось,
Пиже тёкшос озась ковось,
Оймась кудо ланга вармась
Сонгак кунсоломо кармась
Ашо килей, ашо керь,
Прям чаракадсь, лаки верь!
Чии, чии Ратор леесь
Ваны мельганзо килеесь
Чудить, налксить кельме струят-
Костояк истят а муят.
Килеесь кольни, покшкавтни,
Раторонть кежензэ савтни,
Кодаяк сон а ладяви
Раторонтень а маняви.
Виренть экшстэ варштась чизэ
Валовсь сонзэ толонь псизэ.
Килеенть чаракадсь прязо,
Леесь идизе оянзо.
Кутмордызе ды салызе,
Ашо килеесь экшели
Чинть псидензэ ней а пели.
Косо бу сон аволь уле, свал мельс леднесь те кенярксов, те лужаня моротне, конат теке сёлмо лангсо кандылизь сонзэ арсеманзо тиринь масторов.
Моро «Пандо прясо од килей»
Поэтэсь вечкезь сёрмады велень важодиця ломантнеде, сынст оймень мазычидест, вейке-вейкенень лездамодост, вейсэнь тевень теемадонть, од ломанень уцяскадонть. Ёвты сюкпря корьмай модантень – килеень кастыцятненень.
Паксясь буто лембе кедьсэ
Викшнезь пиже мишурасо.
Ашо ликшась пургсезь медьсэ,
Зуйнить мекштне цеця прясо.
Путозь зяро тезэнь ойме,-
Эрьва межась седейс пештязь.
Сюронть кис ломанесь ойми,
Зярдо утомс ули пештязь.
Чинзэ Чоп вестькак а уды-
Касты сюро – покш калаця.
Зяро ливезь сонзэ чуди
Седеезэ тундонь мацей.
Радовавтыть, меленть кастыть,
Волнакс лымбить товзюротне.
Теке праздник сонзэ вастыть-
Сынсь сексня ливтить моротне.
Моданть видьс сюконятано,
Сырнень сюронь кастыцянтень.
Покш пасиба ёвтатано,
Мир – масторонь андыцянтень.
Пиже луга, цецяв луга,
Мекс тон пек мазыят?
Леенть кувалт цеця марто
Варманть мельга чият.
Ужо, учомизь тон минек,
Инжекс теть сатано
Мазый цецят, наян цецят,
Кизэнь луга, цецяв луга,
Мекс тон пек мазыят?
Ков тон истя варманть мельга
Минек эйстэ чият?
1934 иестэ Н.Эркаень примизь СССР-нь Писателень Союзонь членкс. Членской билетэнть тензэ сермадстызе сонсь А.М.Горький. мокшэрзянь писательтне кенярдсть Н.Эркаень кисэ. Поэтэнть седейс те валсь од вийть.
Сон сермады стихть, поэмат, ёвтнемат, терявтни эсь вийтнень художественной прозань покш жанратнесэ.
Великой Отечественной войнанть ушодовомадо мейле Н.Эркай эсь олясо тукшнось фронтов, но кувать воёвамс эзь саво. Лавшо шумбрачинть кис сонзэ велявтызь мекев.
Войнадо мейле Н.Эркаень творчествазо седеяк кемекстась. Нолды зярыя стихень сборникть. 1962-це иестэ лиссь «Алёшка» повестезэ.
Налксеви «Алёшка» повестьстэнть саевкс.
«Килей ведь», «Од родня» повестензэ истя жо лиссть Московсо. Сынь ютавтозь ламо кельс.
1980-це иестэ Московсо лиссь «Шураган» повестезэ. Эрямонь меельце читнес Н.Эркай эзь лотксе стихень, поэмань сёрмадомо. Сонзэ произведениятнесэ ламо домка арсемат, сынь кармавтыть кой-мезенть лангс варштамо овсе од вановтсо. Писателесь ветясь покш общественной важодема. Сон ульнесь СССР-нь Верховной Советэнь ды Саранской горсоветэнь депутатокс. Сон эрясь народ ютксо, явсь мартонзо весе кеняркстнэнь ды мелявкстнэнь, лексесь мартонзо вейкине лексемасо. Сонзэ эйсэ минь ледстнетяно кода поэт, кона эсь проиэведениясонзо морызе тиринь краенть мазычинзэ.
Читайте также: