Маска вынемыш возын стих
Обновлено: 25.12.2024
У ий пайремлан сценарий
У ий пайремлан сценарий
Модшо-влак:
1 лумпырче Вуверкува
2 лумпырче Вувер кугыза
Йÿштö Кугыза Шогертен
Лумӱдыр Маска
Ныжыл сем йоҥга. Вÿдышö-влак сценышке лектыт.
1 вӱдышӧ: Пайрем дене, шушаш У ий дене тендам, шергакан йоча-влак, пагалыме туныктышо, пайремнан унаже-влак!
2 вӱдышӧ: Элыштына пеш шуко сай пайрем уло, но У ий эн сылне, эн пиалан пайремлан шотлалтеш. Таче тиде пайремыш Лумӱдыр ден Йÿштö Кочаят толыт. Мыланна шуко пӧлекым кондат. А кызыт, айста, кож йыр шогалын, «Чодыраште шочын изи кож» мурым муралтена.
(«Чодыраште шочын изи кож» муро почеш мурен-куштымаш)
Сылне, ныжыл сем почеш изи лумпырче-влак лектыт.
Лумпырче: Толын вучымо пайрем
Да куаным йыр шарен.
Кож йыр пöрдын мурена,
Веселан кушталтена.
Лумпырче: Тек У ий конда пиалым,
Тек паша конда куаным.
«Нылытан» да «визытан»
Лийышт шукырак тендан.
Лумпырче: Мемнан деке унала
Толын Йÿштö Кугыза.
Йоча-влакым модыкта
Да пӧлекым кучыкта.
1 вӱдышӧ: Поро кече лийже, лумпырче-влак!
Чыланат: Поро кече!
2 вӱдышӧ: Шергакан лумпырче-влак, йоча-влак шаҥгысек Йÿштö Кугыза ден Лумӱдырым вучат. Нуно кушто улыт?
1 лумпырче: А мый шукертак толыныт, шонышым.
2 лумпырче: Векат корнышто улыт. Айста кычкыралына.
1 вӱдышӧ: Йоча-влак, айста Йÿштö Кугыза ден Лумӱдырым кычкыралына. (Йоча-влак кычкырат.)
Чылан: Йÿштö Кугыза, Лумӱдыр, мемнан деке толза!
Сем йоҥга. (Вуверкува дене Вувер кугыза куржын пурат.)
Вуверкува: Поро кече, йоча-влак! Те мемнан кычкырышда.
Вувер кугыза: Йӱкдам колын, тышке вашкышна.
1 вӱдышӧ: Ме Йÿштö Кугыза ден Лумӱдырым кычкырышна. А тендам вучен огынал.
Вуверкува: Кузе тыге вучен огыдал. Ужыда, мый тыланда пӧлекым конденам. Тиде яра кагаз огыл. Теве уна кампетке, эше печене уло. (Вуверкуван шовыч йырже шере кочкыш-влак кечат.)
Вувер кугыза: Йоҥылыш толына манын, ойлышым вет. Мемнам янлык-влак вучат.
Вуверкува: Тыштат янлык-влак улыт. Теве маска, мераҥ. (Тÿрлö вургеман янлык-влакым ончыкта). Эше иктаж-кӧм муаш лиеш.
1 лумпырче: Пайремыштына сай уна лийыда гын, кодын кертыда.
Вувер кугыза: Тау, йоча-влак, поро кумылан улыда. А мый тендан деч яра ынем кай. Могай пöлекым янлык-влак кочкыт, теат тамлен ончыза.
(Вувер кугыза кӱсенже гыч кампеткым луктеден пуэда.
Вуверкува, кож йыр пӧрдын, йоча-влакым лӱдыктыл куржталеш.)
2 лумпырче: Тиде пайремыш толында гын, икана кож йыр пӧрдын кушталтыза.
Вуверкува: Вувер кугыза, кушталтена мо? Мемнан куштымынам чодыраште веле ужыныт. А тыште о-о-о мыняр шукын улыт. (Кож йыр пӧрдын савырна.)
Вувер кугыза: Йӧра тугеже, тыйын семынет лийже.
(Марий сем йоҥга. Сем почеш коктын куштат.
Куштымашке йоча-влакат ушнат.)
1 вӱдышӧ: Те осал вуверкува ден вувер кугыза огыдал. Пайремышкына кодса. Йоча-влак, пайремышкына кодена мо?
Чылан: Кодена!
(Шогертен чоҥештен толеш.)
Шогертен: Чыланан! Чыланан! Чыланан! Кызыт гына чодыраште Йÿштö Кугыза ден Лумӱдырын толмыштым ужым. Вашлияш ямдылалтса.
Сем йоҥга. Йÿштö Кугыза ден Лумӱдыр толыт.
Йÿштö Кугыза мурен пура.
Йÿштö Кугыза: Салам лийже, уныкам-влак, ача-ава, шергакан уна-шамыч! Мӱндыр корным эртен, тендан деке толын шуна. Чыладамат шокшын пайрем дене саламлена. Таза, пиалан лийза!
Лумӱдыр: У ий пайремда веселан эртыже, кумылда эре поро лийже!
Лумпырче: Айста, кож йыр шогалын, сылне мурым муралтена, вара У ий пайремна весела лиеш. («Изи кож» муро йоҥга.)
Йÿштö Кугыза: Йоча-влак, У ий кожда молан огеш йÿлö?
Лумӱдыр: Кочай, юзо тоят дене У ий кожым сӧрастаре. Икшыве-шамычын кумылыштым нӧлтал.
Йÿштö Кугыза: Тугеже айста иктеш кычкыралына, кычкыралмеке гына тоям юзо вийжым налеш. «Кож, кож чӱкталт!»
Чылан: Кож, кож, чӱкталт! Кож, кож, чӱкталт!
Шогертен: Чӱкталте, чӱкталте! Могай сӧралын коеш!
Маска: (Кож йымач маска лектеш.) Мом тынар кычкыреда, ласка омем пытареда?
Лумпырче: Чодыра оза, нелеш ит нал. У ий пайремыш погынен улына. Пырля теат ушныза.
Маска: Мый вет чодыра оза улам, тендан дене кодашыже лиеш мо, йоча-влак?
Чылан: Лиеш! Лиеш!
Вуверкува: Ужат, маска, сай улметлан тыйымат поктен огыт колто.
Маска: Мый эре сай улам. Тугеже кодам. Лум йымалне киен, могыремат кылмен, веселарак сем почеш кушталтен колтымо шуэш.
Лумпырче: Йоча-влак весела лудиге-влак куштымашым пеш йӧратат. Тыят, чодыра оза, мемнан пелен кушталте.
(«Изи лудиге-влак» куштымаш.)
Йÿштö Кугыза: Йоча-влак пайремлан сайынак ямдылалтыныт. Муро пӧлекдат, очыни, уло.
Шогертен: Уло, уло. Мыят тидын нерген палем. Нуно пеш шуко мурым палат.
Лумпырче. Айста, йоча-влак, Йÿштö Кугыза ден Лумӱдырлан муро пӧлекым ыштена.
(Йоча-влак кож йыр «Толын Йÿштö Кугыза» мурым мурат.)
Йÿштö Кугыза: Мураш мастар улыда, а кушталтен моштеда мо?
Вувер кугыза: Эше кузе моштена! Теве, ончо, мыйынат йолем тарвана. (Вувер кугыза кушталтен онча, вара камвозеш.)
Маска: Коклашке ит пуро, ончо, кузе йоча-влак кушталтат, тыят нуным ончен тунем.
(Марла куштымаш.)
Йÿштö Кугыза: Фу! Ярнышымат. Тӱшкан куштен пеш сайын моштеда. А посна класс дене могай пӧлекым мылам ончыкташ ямдыленда?
(Тунемше-влакын ончылгоч ямдылыме муро ден куштымаш-влак конкурсышт эрта.)
Лумӱдыр: Кочай, йоча-влак почеламутым ямдыленыт. Айста колышт ончена?
Йÿштö Кугыза: Уло кумылын. Нуно муренат моштат, почеламутымат лудаш мастар улыт. (Почеламут-влак йоҥгат.)
Маска: У ий пайремже могай оҥай улмаш! А мый эре мален кийышашым веле палем. Адак могай мурым паледа?
Лумпырче: Чодыра оза, йоча-влак тыланетат мурым ямдыленыт. Тудыжо «Маска вынемыш возын» маналтеш.
(«Маска вынемыш возын» муро йоҥга.)
Йÿштö Кугыза: Пеш кертыда, йоча-влак! Чолга улыда, уш-акылдат писе улмаш, мыйым сайын куандарышда. Вургемдаже могай мотор! Пайрем тӱсым сайынак пуртеда. У ий пайремлан лӱмынак вургемым ямдылыше-влакым кож йыр шогалаш йодам. Тыланда сылне пӧлек лиеш. (Корзина гыч пӧлекым пуэдымаш.)
Йÿштö Кугыза. Йоча-влак, У ий пайремлан тендан кидда дене сӧрастарыме кожда пеш мотор лийын. Сеҥыше-влакым палемдыме шуэш. (Ончылгоч увертарыме конкурс почеш иктешлымаш эрта.)
Йÿштö Кугыза: Шерге уныкам-влак, ынде мыланна каяш жап шуын. Те чыланат пеш келшышда, вес ий марте тендан дене порын чеверласена. Ушан-шотан, поро кумылан лийза! Ваш-ваш эре полшен шогыза!
Лумӱдыр: Вес ий марте, чеверын! (Йÿштö Кугыза ден Лумӱдыр каят.)
Вӱдышӧ: А мемнан пайремна умбакыже шуйна. Кож йыр шогалын, муралтен, кушталтен колтена.
Ончылгоч ямдылыме муро да куштымаш почеш пайрем умбакыже шуйна. Тиде жапыштак тÿрлö конкурс ден модыш-влак эртат. Пайрем мучаште лотерей модыш эртаралтеш.
Читайте также: